Oruc – Allahın ən sevdiyi əməllərdən biridir. Oruc tutan adam, təkcə mədəsini deyil, gözlərini, qulaqlarını və digər orqanlarını da yalnış işlərlə məşğul olmaqdan qorumalıdır.

Oruc tutan insanı, Uca Allah çox sevir və dəyərini ucaldır. Buna görə də, oruclu insanın iftar açarkən öz sağlamlığına diqqət yetirməsini istəyərək, yeyiləcək qida vasitələrini də ona izah etmişdir. Müasir elm bir çox şeyi yenicə kəşf etsə də, Uca Allah Öz əzəli və əbədi Elmi ilə, insanlar üçün bir çox faydaları, əsrlər öncə bildirmişdir. Uca Allah bəndələrinə qarşı çox şəfqətli və rəhmlidir.

Quranda adı çəkilən üç meyvədən biri olan xurma, ərəb dünyası üçün “səhra çörəyi” simvoludur.

Əziz Peyğəmbərimi (ona salam olsun), Ramazan ayında iftarını xurma ilə açar və mümkün olduğu qədər sahur və iftarda xurma yeyilməsini tövsiyə edərdi.

Təbii şirniyyat olan xurma insana güc verir, böyrək, ürək, qaraciyəri möhkəmləndirir. Bağırsaqlarda faydalı bakteriyaların inkişafına yardım edir. Quru xurmada 70% şəkər olur ki, bu da istənilən meyvədən daha çoxdur.

Xurmanın tərkibi: şəkər, zülal, karbohidrat, dəmir, maqnezium, fosfor, A, B1, B2 vitaminləridir. Orucun su və xurma ilə açılması, saatlarla ac olan beyin, mədə və bağırsaqların hazırlanması, özünə gəlməsi üçün ən ideal variantdır. Məhz xurma bağırsaqları, ümumilikdə selikli qişanı iftar zamanı yemək qəbuluna hazırlayır, normal fəaliyyət göstərməsinə kömək edir. Xurma damarları yumşaldır, sinir hüceyrələrini lazım olan qlükoza ilə təmin edir. Xurma qəbizlik, həzm pozğunluğu, ürək bulanma, iştahasızlıq kimi problemlərə də ən ideal çözümdür.

Xurma antioksidantdır. Bu da xərçəng hüceyrələrinə qarşı müdafiə qabiliyyətini artırır. İnsan ac olarkən dili üzərində, ağız boşluğunda, mədə yolu və bağırsaq qişasında bakteriya dolu ərp yaranır, orqanizm təmizlənir. Əgər insan başqa qida vasitələri ilə iftarı dərhal açarsa, bu toksin maddələr orqanizmdə qalır, mədəyə düşərək, bədəndən ixrac olmur. Lakin xurma və su, bu zərərli maddələri özünə hopdurur və yenidən orqanizmə yayılmasına imkan vermir. Ona görə əsrlər keçsə də xurma iftar süfrəsindəki şah yerini qoruyub saxlayır.

Allah və Onun peyğəmbərinin bizlərə vermiş olduğu tövsiyələrdə böyük hikmət və faydalar vardır.

“Allah sizin üçün çətinlik deyil, asanlıq istəyir.” (Quran, 2/185)

www.islamevi.az (Tərtib: Ayxan Yaquboğlu)

Share Button
Tarix: 28.05.2019 | Oxunma sayı: 476 baxış