Gələcək haqda qayğılar, bir çox insanın narahat bir həyat yaşamasına səbəb olur. Bu narahatlıqlar, həm psixoloji, həm də dini-mənəvi olaraq mənfi təsirlərini göstərə bilir. Çox zaman isə, bu qayğı və narahatlıqların heç bir əsası olmur və hətta vəsvəsələrlə əlaqəli olur. Halbuki, əsası olmayan qayğı və şübhələrin çoxu, əslində heç baş vermir. Tövratda da “qorxulan şeylərin çox baş verməz” – deyilmişdir.

 

Yəni, olacağından qorxulan şeylərin çoxu, baş verməz. Zehinlərdəki düşüncələr (qayğılar), real həyatda baş verən hadisələrdən qat-qat çoxdur. Böyük alim Həsən əl-Basri’nin dediyi bu sözlər, bunu daha açıq ifadə edir: “Dünya üç gündür. Biri dünən idi, o artıq geri dönməyəcək. Biri sabahdır, onu yaşayıb görəcəyinə dəqiq ümidin/ehtimalın yoxdur. Sənin bircə günün var – o da bu gündür. Ondan doğru istifadə et!”

 

Bizdən öncə yaşamış müdriklər belə deyərdilər: “Qəlbimə dedim ki, əgər içinə narahatlıq çökərsə, rahat ol. Çünki, qorxulan şeylərin çoxu əslsizdir.”

 

Gələcəyi doğru formada düşünmək, doğru hədəflər seçərək, bu yolda çalışmaq – müsbət bir xüsusiyyətdir. Lakin, əslsiz narahatlıqlara görə üzülmək, həyatı qaraldaraq psixoloji gərginliklərə qapılmaq, üstün bir şəxsiyyət olan müsəlman’a yaraşmaz. Buna görə də, bir xəbər, bir müsibət qulağa gəlib çatdıqda, tələsərək panikaya qapılmaq və kədərlənmək doğru deyildir. Çünki, xəbərlərin və gözləntilərin çox əslsizdir. Soyuqqanlı bir şəkildə tələsməmək və araşdırma yolunu tutmaq, Uca Rəbbimizin bizlərə tövsiyəsidir:

 

“Ey iman edənlər! Əgər bir fəsadçı sizə bir xəbər gətirsə, (onu) araşdırın..” (Hucurat, 6).

 

Bilmək lazımdır ki, hələ baş verməmiş və baş verəcəyi də dəqiq bilinməyən şeylərə görə narahatlıq keçirmək, Allahın yazdığı Qədər’ə (taleyə) bir təsir etməz, sadəcə insanın özünə mənəvi və psixoloji zərbələr vurar. Müsəlman, qorxduqlarından Allah’a sığınmalı, bol-bol dua etməli və işlərini – ədalət və hikmət sahibi olan Uca Rəbbinə həvalə etməyi bacarmalıdır.

 

“..Mən öz işimi Allaha həvalə edirəm. Həqiqətən, Allah qullarını görür.” (Ğafir, 44).

 

Bəli, İslam dini, əbədi həyatı qazandırmaqla yanaşı, insanı dünyanın psixoloji sarsıntılarından qoruyur.

 

 

Hazırladı: Ayxan Yaquboğlu

Materiallardan istifadə edərkən istinad vacibdir!

Share Button
Tarix: 13.11.2016 | Oxunma sayı: 2. 147 baxış